মুখ্য পৃষ্ঠা
06/04/2514:40
"কবিৰ প্ৰেম আৰু স্বদেশ"
মদাৰৰ হাঁহিত জুই লগা আকাশে
চিঠিৰ নীলা বোৰ যেন কাঢ়ি নিলে |
সাগৰৰ নীলা বোৰ
মানৱৰ কেঁচা তেজে গ্ৰাস কৰিলে |
বিংশতম শতিকা গৰকী
একবিংশ শতিকা দূৱাৰ দলিতে
মানৱে পঢ়িলে আধুনিকতাৰ পাঠ |
ধুঁৱা বৰণীয়া বিংশ শতিকাৰ পৃষ্ঠাবোৰ
মৈদামৰ সাক্ষী হৈ ৰল |
দেশৰ বিড়ম্বনাত শান্তীৰ পখীজাক
উৰি গ'ল অচিন দেশলৈ |
অজলা কবিৰ দুখ
একেই আছেনে কবিৰ স্বদেশ ?
স্বজাতিৰ বুকুত শব্দৰ বীজ সিঁচি
কবি ভাগৰি পৰিল
তথাপি স্বদেশত শেষ নহ'ল
হিংসাৰ আন্দোলন |
কবিতাৰ ছন্দে ছন্দে কান্দে
অসুখীয়া কলিজাই |
আঙুলি কাটি ভোগ দিব নোৱাৰি দানৱক
কেঁচা তেজৰ সোৱাদ |
প্ৰেমৰ মহামন্ত্ৰ জপ কৰি
প্ৰেমিক হোৱাৰ দুস্বপ্নত
আত্মহত্যা কৰে কবি |
শেৱালীৰ পাহে পাহে
আকাশে উচুপি কান্দে |
কবিয়ে আকাশক চিঞঁৰী সুধে
'ভাল পাওঁ বুলি ক'লে ,
তোমাৰ বুকুত কি ফুল ফুলিব'
আকাশেও তেতিয়া লাজ কৰে |
শিল্প বোৰ মাটিত মিলি গ'ল
সাগৰ মহাসাগৰ সাক্ষী হ'ল
বনজুইৰ দৰে জ্বলে স্বদেশত চিতা
শিয়ালৰ ৰাউচিত জোনাক গলি এন্ধাৰ হ'ল |
© ৰাজু কলিতা
06/01/15
